Cymdeithas Hanes Ceredigion
O'r chwith i'r dde: Peter Davies (Cadeirydd Cyngor Sir Ceredigion) a Geraint H.Jenkins

Lansiad Llyfr Hanes Sir Aberteifi

Cafodd y gyfrol hirddisgwyliedig ar hanes Sir Aberteifi yn yr Oesoedd Canol ei lansio gerbron cynulleidfa lawn yn Y Drwm, Llyfrgell Genedlaethol Cymru, ar Ddydd Sadwrn 5 Hydref. Cynhyrchwyd y llyfr sylweddol a hardd hwn, sy’n cynnwys nifer fawr o luniau, ar y cyd gan y Comisiwn Brenhinol, Gwasg Prifysgol Cymru, a Chymdeithas Hanes Ceredigion.

O'r chwith i'r dde: Peter Davies (Cadeirydd Cyngor Sir Ceredigion) a Geraint H.Jenkins
O’r chwith i’r dde: Peter Davies (Cadeirydd Cyngor Sir Ceredigion) a Geraint H.Jenkins

Mae’r gyfrol yn ymdrin â hanes cymdeithasol, gwleidyddol, crefyddol a diwylliannol cyfoethog tiriogaeth a ddaeth yn sir yn sgil y goresgyniad Eingl-Normanaidd o dde-orllewin Cymru. Mae penodau swmpus gan gyn Gadeiryddion y Comisiwn, Beverley Smith a Ralph Griffiths, yn ymdrin â hanes gwleidyddol a gweinyddol Ceredigion. Ceir penodau awdurdodol ar gestyll Cymreig a Seisnig Ceredigion gan David Browne a’r diweddar Jack Spurgeon, ac ar dai canoloesol a’r tai a’u dilynodd gan Richard Suggett. Trafodir amaethyddiaeth, addysg a rôl yr uchelwyr a’u hystadau, ynghyd â diwylliant llenyddol helaeth Ceredigion a chyfraniad beirdd diwedd yr Oesoedd Canol, gan gynnwys Dafydd ap Gwilym. Mae penodau eraill yn ymdrin â hanes crefydd yn yr Oesoedd Canol a rôl ganolog yr abaty Sistersaidd pwysig yn Ystrad Fflur, yr eglwys wedi’r Diwygiad, a hanes gweinyddol a chyfreithiol y sir cyn ac ar ôl y Deddfau Uno.

Ceir yn y llyfr lu o luniau, gan gynnwys mwy na 200 o ffotograffau (awyrluniau yn eu plith) a lluniadau o adeiladweithiau hanesyddol a nodweddion archaeolegol o gasgliadau archifol y Comisiwn Brenhinol a grëwyd gan Toby Driver, Iain Wright, Charles Green ac eraill.  Gobeithir y bydd y gyfrol yn gyfraniad hirbarhaol i hanes y sir ac i hanes Cymru’r Oesoedd Canol yn gyffredinol.

Yn ystod y lansiad cafwyd rhaglen lawn o sgyrsiau (Geraint Jenkins, Richard Suggett, Eryn White), cerddoriaeth gan Owen Shiers a’r Gaseg Deircoes/Three Legg’d Mare, a chyfraniad gan Eurig Salisbury ar Dafydd ap Gwilym. Gellir gweld recordiad o’r lansiad ar Dudalen Facebook y Gymdeithas, Ceredigion History.

  • O'r chwith i'r dde: Golygyddion Richard Suggett, Geraint H. Jenkins ac Eryn M. White.
  • Cacen lansio llyfrau - Hanes Sir Aberteifi Cyfrol 2 Canoloesol a Modern Cynnar Cardigan
  • O'r chwith i'r dde: Natalie Williams (Gwasg Prifysgol Cymru) Peter Davies (Cadeirydd Cyngor Sir Ceredigion) a Geraint H. Jenkins
  • O'r chwith i'r dde: Peter Davies (Cadeirydd Cyngor Sir Ceredigion) a Geraint H.Jenkins
  • O'r chwith i'r dde: Richard Suggett, Natalie-Williams (Gwasg Prifysgol Cymru) Peter Davies (Cadeirydd Cyngor Sir Ceredigion) Geraint H. Jenkins ac Eryn M. White
  • Cacen lansio Cyfrol-2 Hanes Sir Aberteifi

Richard Suggett Cardiganshire County History, Volume 2: Medieval and Early Modern Cardiganshire.  Golygwyd gan Geraint H. Jenkins, Richard Suggett ac Eryn M. White.  Cyhoeddwyd gan Wasg Prifysgol Cymru ar ran Cymdeithas Hanes Ceredigion Historical Society a CBHC/RCAHMW, 2019.

  • Pris: £45. 
  • 550 tudalennau
  • Clawr caled – ISBN 978-1-78683-452-2. 
  • eBook epub – 9781786834546
  • eBook mobi – 9781786834553
  • eBook PDF – 9781786834539

Gadael Ymateb